Uyaphenywa oweBig Brother oxine indoda yomuntu

KUNGASE kumshubele omunye wabasendlini kaBig Brother Mzansi osolwa ababukeli ngokwephula imithetho yakulolu hlelo.

UKarabo Sejojo owaziwa ngelikaJojo ohlelweni nongowaseBloemfontein, usolwa ababukeli ngokungenzi kahle kulolu hlelo. 

Phakathi kwezinto ezidina ababukeli abazizwakalise ezinkundleni zokuxhumana ezifana no-X, ukulandela omunye wozakwabo wesilisa ngisho eya endlini encane.

UJojo, ozalwa ngumfundisi, usezwakale kaningana etshela laba azwana nabo ukuthi uyazifela ngo-Akhonamathemba Mbhele obizwa ngoSweet Guluva. 

Unesifiso sokuthi bangaba nobudlelwano bothando. Yize kunjalo, uSweet Guluva akamnakile.

USweet Guluva ongowaseNquthu, uzifela ngo-Ashley Ogle osanda kukhishwa kulolu hlelo. 

Akakufihli ukuthi mhla waphuma kulolu hlelo yena no-Ashley bazoqhubeka nothando lwabo. 

Lokho akwehli  kahle kuJojo osephenduke inamathela kulo mlisa.

Kamuva nje uJojo, usevele asenge ezimithiyo uma exoxa nozakwabo enze sengathi uSweet Guluva nguye olandela yena nofuna bagonane futhi baqabulane. 

Ngokwenye yezincwadi esabalele ku-X ebhalwe ababukeli, lesi senzo sibi futhi sikhombisa ukungamhloniphi uSweet Guluva futhi kumehlisa isithunzi njengoba uJojo ezisholo yena ukuthi useke waze wayompopolaechama wajatshuliswa wukubona isitho sakhe sangasese.  

Ababukeli balolu hlelo sebebhalele abaxhasi beBig Brother Mzansi, iBCCSA kanye noMultichoice bezwakalisa ukungenami.

AbeBig Brother Mzansi nabaxhasi bohlelo iLotto Star neRobertson Spice bakhiphe isitatimende esiqinisekisa ukuthi bazophenya okushiwoyo baphinde bathathe nezinqumo uma kufanele. 

Bathe imigomo nemithetho ebekiwe kubalulekile ukuthi ihlonishwe kanti uma kukhona abayephulayo bathatha izinyathelo.

FUNDA NALANA: Kuvela okucike uBetusile ngoweBig Brother abemeseka

Selokhu lolu hlelo luqalile kulo nyaka kuzoba ngokwesine uBig Brother ehlawulisa abaphule imithetho.