Lubuya nezinguquko olwabafazi beziqumama zaseThekwini

ZICHITHWE njengamanzi izimpunyela zosaziwayo  ohlelweni iThe Real Housewives of Durban (RHWD).

Lolu hlelo lukhuza ibuya ngenyanga ezayo kuShowmax ngosuku olusazomenyezelwa.

USlee Ndlovu, Ameigh Thompson, Maria Valaskatzis, noZama Ngcobo ngeke besabonakala kwisizini yesihlanu.

Abaka-Showmax baveze ukuthi ngokuhamba kwesikhathi bazomemezela izintokazi ezintsha ezizoba yingxenye yohlelo, nosuku oluzoqala ngalo.

Kwababuyayo abake babonakala kubalwa uNonku Williams, Sorisha Naidoo, Jojo Robinson no-Angela Ndlela. 

USam Kelly, omunye wabasunguli bohlelo, uveze ukuthi ziningi izinguquko ezizobonakala.

“Ngesizini ezayo sizobona abesifazane abazobe bekhona, beshayisana ngemibono ehlukene.

“Basivezela izimpilo zabo eziphambili, indlela abakhule ngayo selokhu bekulolu hlelo nokunye esingeke sikuveze manje okuzogqama ohlelweni,” kuchaza uKelly.

FUNDA NALANA: U-LaConco uzodedela izigaxa ngothando lwakhe noJacob Zuma

Amazwibela alolu hlelo aseqalile ukujabulisa abalandeli balo ezinkundleni zokuxhumana kanti baningi abakhombisa ukulangazelela ukuqala kwalo.