Kushone inkakha yezokuxhumana embonini yezokungcebeleka
ISIGQEMEKE udume lwengozi imboni yezokungcebeleka ngokudlula emhlabeni kwenkakha yomeluleki kwezokuxhumana kwezokungcebeleka, uJay Badza.
Izindaba zokudlula emhlabeni kukaBadza ziqinisekwe kwisitatimende esinamekwe ekhasini lebhizinisi likamufi.
” Sifisa ukudlulisa izindaba ezibuhlungu zokudlula emhlabeni komsunguli wezinkapani i-Orchard on 25 neHead Honcho, uJay Badza,” kusho isitatimende.
Siqhube saveza ukuzwelana okukhulu nomndeni kaBadza osemanzini njengoba usazilile. Sicele ukuba umndeni unikwe ithuba ungaphazanyiswa njengoba usemanzini.
Siqhube sathembisa ukuthi umphakathi uzokwaziswa ngamalungiselelo enkonzo yesikhumbuzo nangawomngwabo. Kulesi sitatimende akuvezwanga ukuthi umufi uthathwe yini.
UBadza uzakhele ugazi ngokusebenzisana namaciko nosaziwayo abaningi okubalwa kubona uBonang Matheba ake wayimenenja nomngani omkhulu. Akumangazanga uma eba ngomunye wabangani abake bathi xinti, bevela ohlelweni olwalungempilo kaBonang, iBeing Bonang eminyakeni edlule.
Ubuchule bukaBadza ekusingatheni igama nezindaba kwezikuxhumana nokukhangisa, kumenze wayintandokazi yosaziwayo beqophelo eliphezulu kuleli nasemazweni angaphandle.
Umsebenzi wakhe omuhle uqhubeke wabonakale esesungule izinkampani zakhe iHead Honcho ne-Orchard on 25. Uke wabonakala nasemaphephandabeni aphambili emhlabeni okubalwa iForbes neGQ ngenxa yemisebenzi yakhe.
