Bazogcwala amajele abathinteka ekubulaweni kukathisha waseSikhethuxolo

AMAPHOYISA athi kusazoboshwa inqwaba ngelokubulawa kwephini likathishanhloko waseSikhethuxolo High School eMpumalanga Township.

Akusho lokhu nje, izolo bekuvele umsolwa(28) ngaleli cala phambi kwemantshi kaWebber eHammarsdale ngokubulawa ngokudutshulwa kukaMnuz Busani Khomo.

UMnuz Khomo (57) owayeyiphini likathishanhloko eSikhethuxolo High School, wadutshulwa esanda kuqeda umsebenzi wesikole lapho ayefundisa khona. Lesi sehlakalo senzeka kumgwaqo uSofasonke e-unit 6 ngoDecember 5 nyakenye.

Ukubulawa kwakhe kwethusa umphakathi nozakwabo kwezokufundisa. Lokhu kungenxa yokuthi wayeyintandokazi kathisha kuleli lokishi, ngenxa yentshisekelo nothando ayenalo ngomsebenzi wakhe.

Idokodo lokubulawa kwakhe lavulwa maqede ladluliselwa uPhiko lweSifundazwe Lwamacala Abucayi noDlame. Amaphoyisa awapholisanga maseko aphenya enza nomkhankaso wezobunhloli ngaphakathi elokishini eMpumalanga nokuthe kuthangi lwathela izithelo. Kube sekuboshwa umlisa oneminyaka oyedwa.

Amaphoyisa aphinde athola ibhulukwe nokukholakala kuthi umsolwa wayeligqoke ngosuku lwesigameko. Umsolwa uvele kafushane enkantolo kamantshi kaWebber eHammarsdale izolo futhi usangaphakathi.

UKhomo ubeyilungu lenyonyaka yothisha South African Democratic Teachers Union (SADTU kanti ubehlonishwa kakhulu ngenxa yokukhuthala kwakhe kule nyonyana.  

Ngokombiko weSADTU, uKhomo ufundise eNgede Primary wabe esedlulela eLuthayi High School ngo-2013 ngaphambi kokuya eSikhethuxolo nokuyilapho ehambe eseyiphini likathishanhloko khona.