Ingqophamlando u-Andile KaMajola ethula incwadi yamahubo angu-300
SEKUBALWA izimuzwana ngaphambi kokuthi isihlabani somculo wokholo sethule umsebenzi waso wakamuva esiwubiza ngeJourney of Psalms Gospel Event.
UPastor Andile KaMajola uzoba ngumculo wokuqala kuleli ukwethula incwadi yamahubo emlandweni jikelele. Uzokwethula lo msebenzi wakhe omusha e-Durban International Convention Center (DICC) namuhla ntambama ngo-6.
Le ngqophamlando izokhombisa elinye ikhono lakhe lokuhlanganisa incwadi yamahubo enezingoma ezingcwele. Ingqikithi yalo mcimbi omkhulu ukwethulwa kwencwadi yamahubo, iThe Journey, Hymns & Spiritual Songs.
NgokukaMajola, leli qoqo elimangalisayo, elihlanganisa izingoma ezingcwele ezingaphezulu kuka-300, liwubufakazi bamandla angapheli nobuhle bomculo wevangeli.
Lizosebenza njengenqolobane ebalulekile yomlando ongokomoya nowamasiko, ingqikithi yesiko lomculo elivundile elikhuthaza futhi lahlanganisa imiphakathi eyahlukene nezizukulwaneni,UKaMajola uthe :
” I-Journey of Psalms Gospel Event ingaphezu nje komcimbi womculo; kuwukubungaza amagugu ethu esabelana ngawo, ukuhlonipha amazwi okhokho bethu, nesibani sethemba ezizukulwaneni ezizayo. Ngale ncwadi yamahubo, sihlose ukulondoloza izingoma ezithinta umphefumulo nemiyalezo enamandla ebiwumthombo wamandla nobunye kubantu bakithi.”
Kulo mcimbi ozobe unendathane yosaziwayo nabanye ozakwabo emculweni abazomeseka, uzoshiyelana inkundla nabaculi okubalwa kubona uJabui Hlongwane noDumi Mkokstad ukubala abambalwa.
Impumelelo yale ngqophamlando ibe ngenxa yokubambisana okuhle phakathi kukamasipala weTheku, uMnyango wezokuThuthukiswa koMnotho, ezokuVakasha nezeMvelo KwaZulu-Natal kanye noHulumeni waKwaZulu- Natal.
UKaMajola ubalwa nezinkakha embonini yomculo wokholo ezinezibindi nentshisekelo yokwenza izinto zenzeke.
Useke wanqoba izindondo ezibalulekile kule mboni okubalwa kuzona ezamaCrown Gospel Awards nezinye eziningi.
Ngaphandle komculo ungene shi nakwezamabhizinisi aphinde abe ngumholi webandla we-All Nations Cathdral International Church ezinze eThekwini.
