Zivele enkantolo izikhulu zikamasipala ezisolwa ngokukhwabanisa uR25 million
ISIKHULU esiphezulu sezeziMali kuMasipala Wesifunda saseBojanala nabasebenzi abangaphansi kwaso abane bavele eNkantolo yeMantshi yaseRustenburg, eNorth West ngesinzolo zokukhwabanisa.
Laba bavele ngezinsolo zokuzitamuzela bakhwabanise imali kamaspala elinganiselwa ku-R25 million.
ULeslina Olga Ndlovu (43) ebambisene nozakwabo uPatrick Pogisho Shikwane (53) onguSotswebhu wesifunda saseBojanala, uPatrick Tlhapi (53), unobhala wowayeyimenenja kamasipala uGontse Kekana (39) noMantsho Gloria Moremi (38).
Bonke abasolwa bavele enkantolo namuhla bebhekene namacala amaningi okubalwa kuwo ukukhwabanisa, ukushushumbisa imali, inkohlakalo nokwephula umthetho iMunicipal Finance Management Act 56 of 2003.
Abasolwa baboshwe oKlebe ngoMsombuluko, 17 March 2025 nonyaka.
“Ukuboshwa kwabo kulandela uphenyo olwenziwa oKlebe oluphenya ngobugebengu obubucayi kwezohwebo ngezinsolo zokuqola uMasipala iBojanala Platinum District Municipality imali engaphezu kuka-R25 million phakathi kukaDecember 2018 noMeyi 2019,” kusho okhulumela oKlebe eNorth West uLieutenant Colonel Tinyiko Mathebula.
Izinsolo zithi ngo-2018, uNdlovu wasebenzisana nomhlinzeki wemisebenzi, osagcwele amathafa, ukuze inkampani yakhe
ifune ukukhokhelwa ngezinsiza ezinikezwa umasipala. Inkampani le ibingekho ohlwini lwezingahlinzekwa ngemisebenzi kamasipala.UNdlovu nomhlinzeki wemisebenzi kuthiwa basebenzise imininingwane yomhlinzeki obhalisiwe ukuze bafune izinkokhelo.
Uphenyo luveza ukuthi, lezi zinkokhelo kuthiwa zikhokhwe ku-akhawunti yasebhange engekho kusizindalwazi sikamasipala.
ULieutenant Colonel Mathebula uthe uphenyo luveze ukuthi u-R2 million wakhishwa kwi-akhawunti yasebhange yafakwa kweyenkampani kaNdlovu.
“Kuphinde kwatholakala ukuthi imali engu-R150 000 yakhishwa isuka ku-akhawunti yasebhange yafakwa ku-akhawunti kaSotswebhu omkhulu,” kusho uLieutenant Colonel Mathebula.
Kubikwa ukuthi unobhala wowayeyimenenja kamasipala uhlomule u-R850 000 kule mali.
UShikwane ubhekene namacala angu-53 okukhwabanisa, angu-53 okushushumbisa imali, nelilodwa lokwephula uMthetho Wokuphathwa Kwezimali Zomasipala.
UNdlovu ubhekene namacala angu-53 okukhwabanisa, angu-53 okushushumbisa imali, namahlanu enkohlakalo.
UTlhapi ubhekene necala lenkohlakalo, kanti uKekana yena ubhekene namacala amabili enkohlakalo; kanti uMoremi ubhekene necala lokushushumbisa imali.
Bonke abasolwa bagcinwe esitokisini ngesikhathi icala lihlehliselwa uLwesine ukuze bafake isicelo sebheyili.
UMathebula uthe bangase babophe abanye abasolwa ababili. Uqhube wathi yonke imininingwane mayelana nokukhwabanisa kuka-R25 million izodalulwa uma sekuboshwe nalaba abanye.
Ibamba leNhloko yophiko oluphenya ngamacala abalulekile esifundazweni, uBrigadier Silas Munzhedzi noMqondisi wezokuShushiswa koMphakathi eNorth West, uDkt. Rachel Makhari, bakushayele ihlombe ukusebenzisana koKlebe ne-NPA ekuqinisekiseni ukuthi abasolwa bayaboshwa.
