Injabulo uSweet Guluva ewina kwiBig Brother Mzansi

SEKUNGUMLANDO ukuthi insizwa yaseNquthu, Kwazulu-Natal u-Akhonamathemba Mbele owaziwa ngelikaSweet Guluva ube ngimnqobi weBig Brother Mzansi 5.

Lolu hlelo obeselufike osukwini lwesi-72  lusongiwe namuhla.

Umethuli walo iSmash Afrika wenze umsebenzi oncomekayo kusukela luqala luzo luyophela eluphethe ngobunono.

Izolo ngaphambi komjuxuzo wokugcina walolu hlelo, uSmash uvakashele abadlali abahlanu abebebhekene kowamanqamu.

Laba abahlanu bekunguJojo, Nate, Nsuku, Uyanda noSweet Guluva.

Uxoxe kabanzi nabo  waphinde wabapha izondondo ezingamaqhaza abawabambe kusuka uhlelo luqala.

Namuhla umemezele uJojo kuqala njengophume ohlelweni. Ngamanye amazwi ulale isihlanu.

Ezithendeni kulandele uNate nobe eselandelwa nguNsuku olale isithathu.

Endaweni yesibili kumenyezwe u-Uyanda. 

Besekusobala ukuthi umnqobi wuSweet Guluva ngenxa yokuthi abalandeli bakhe bebeliphakamise ngokuxakile izinga lokukhankasa.

Kuyaqapheleka nokho ukuthi isicoco salolu hlelo sesijwayele ukuthi sithathwe ngowaKwaZulu-Natal.

Lokhu kungenxa yokuthi nanyakenye, lolu hlelo lwanqotshwa uMcJunior waseBergville.