Uziqhathe nabalandeli ba-Ashley Ogle umlingisi owenze ihlaya elingahlekisi

ISIHLABANI somlingisi sesifongqe isigqoko saxolisa esizweni ngenxa yehlaya lakhe elingahlekisi alenze ngo-Ashley Ogle weBig Brother Mzansi.

UWiseman Ncube ugcine ehlele ngezansi okwesicabucabu, waxolisa ngemuva kokutaxwa ngabalandeli bakhe naba-Ashley Ogle, bemthethisela ukukhuluma kabi.

UWiseman ubephawule ngo-Ashley okukholakala ukuthi ubengazi ukuthi ungowaseWentworth eThekwini.

Embhalweni awunameke ekhasini lakhe uWiseman, uthe u-Ashley uyikhaladi laseWentworth ngakho kuhle uSweet Guluva abaleke kusenesikhathi.

Ukusho lokhu nje kuyaziwa ukuthi u-Ashley ube nobudlelwane bothando noSweet Guluva ngesikhathi besendlini kaBig Brother Mzansi.

U-Ashley usheshe waphuma kulolu hlelo ngesonto lesithupha esohlelweni. Lokhu kwenzeke 

ngemuva kokuthi uSwiss enikwe umnqamlajuqu wokukhetha oyedwa phakathi kuka-Ashley noNsuku ofanele ukukhonjwa indlela.

Inkulumo kaWiseman ngobuhlanga nangendawo aphuma kuyona u-Ashley ayehlanga kahle kwabaningi abayihumushe njengokucwasa.

Yingakho bevuthe umlilo kuthi abamudle bamufele uWiseman ngamazwi akhe anenhlabathi.
Ulaka lwabalandeli lumenze waxolisa ngaleli hlaya elingahlekisi alenzile. 

” Kuthiwa eyonile uma ilibona iphutha iyaxolisa,” kuqala isixoliso sikaWiseman. 

Uqhube wathi ubengaqonde okubi. Ubethi wenza ihlaya kodwa kuhlale obala ukuthi uphaphalazile. Ulivumile icala lakhe wathembisa ukwenza kangcono ngomuso.

Yize eshweleze kanje, waze wafaka nophawu lokucela uxolo ngokuphakamisa izandla zombili kodwa kunabalandeli abathi uxolisa ngoba nakhu ekhaciwe.