Usengene ebhizinisini lokudla uDJ Sbu

U-DJ Sbu wethule indawo yokudla yezimanje eku-inthanethi, i-Mzakes’ Kitchen, ku-Uber Eats

Usomabhizinisi odumile nosaziwayo u-DJ Sbu wethule leli bhizinisi lakhe lakamuva, iMzakes’ Kitchen, indawo yokudlela esebenza ku-inthanethi egxile ekuhwebeni ngokudla kwase-Afrika. 

Kulesi simemezelo sikaDJ Sbu uveze ukuthi ukudla kwakhe kuzotholakala kuphela ku-Uber Eats, kanti kulindeleke ukuthi kuqale ukusebenza ngempelasonto yePhasika eGoli.

IMzakes’ Kitchen ihlose ukuletha ingxubevange yokudla kwangempela kwakulelizwekazi lase-Afrika kubantu abaningi ngokusebenzisa kalula ukulethwa kokudla okusekelwe kuhlelo lokusebenza. 

Nakuba lolu hlelo lokusabalalisa ukudla luzoqala ngokuba online, luzoqhakambiza ukusebenza kwezobuchule besimanje.

Okunye okuvelayo wukuthi kulabo abanothando lokuhweba ngale ndlela bangene ngaphansi kwaleli bhizinisi likaDJ Sbu, bazowathola amathuba eFranchise.

Amathuba e-franchise azotholakala ngo-Aprili 2026, anikeze amathuba okunwebeka kwabafuna ukuba ngabanikazi bamabhizinisi.

Abathandi bokudla eGoli bazokwazi ukuqala ukuthenga kusukela ngePhasika.

Kwabalandela kahle uDJ bazokhumbula ukuthi igama okuqanjwe ngalo leli bhizinisi lokudla lisuselwe kuMzekezeke wodumo lwezingoma ezashisa izikhotha ngeminyaka yama-1990’s.

UMzekezeke kwakukholakala ukuthi nguye uDJ Sbu kodwa wayesuke egqoke isifihlabuso esimnyama kanye ne-overall esawolintshi.

Akuqali ukuthi uDJ Sbu angene ebhizinisini. Eminyakeni edlule waqhamuka nesiphuzo esibuyisa amandla iMoFaya. Nakuba yabhekana nezinselele ngesikhathi isafika emakethe.

Ukuzimisela nokuphokophela phambili kwamsiza njengoba namuhla isitholakala ezitolo eziningi futhi isivulele inqwaba yentsha amathuba omsebenzi.