ISABC icacisa ngekusasa leGenerations: The Legacy

INHLANGANO Esakaza ngomoya kuleli (SABC) isiphumele obala yacacisa ngodaba olusematheni oluthinta inkontileka yomdlalo iGenerations: The Legacy esakazwa kuSABC1 phakathi nesonto. 

Isitatimende siveze ukuthi lomdlalo kumanje ukwisizini ka-33. 

Bathe isivumelwano sesizini ka-34 sisesigabeni sokugcina sokuphothulwa phakathi kwezinhlangothi zombili.

 “ISABC neMorula Pictures bathanda ukuqinisekisa umphakathi ukuthi iGenerations: The Legacy izoqhubeka nokudlala kuSABC 1 ngaphandle kokuphazamiseka phakathi kweSeasons 33 no-34.

ISABC iqhube yadlulisa ukubonga kwiMorula Pictures, abalingisi nabasebenzi, ngokuzibophezela kwabo okungaguquki kanye negalelo elibalulekile empumelelweni eqhubekayo yalo mdlalo osuzuze izindondo.

Isitatimende siqinisekise ababukeli ukuthi : ” bangabheka ezindabeni ezihehayo nezishukumisayo ngesizini ezayo.”

Lesi sitatimende esiqinisekisa ababukeli ngekusasa lalo mdlalo, siza ngemuva kovalo kubalingisi nababukeli ngekusasa lalo mdlalo.

Lokhu kungenxa yokusabalala kwemibiko yokuthi abasebenzi nabalingisi batshelwe ukuthi ake bathi ukuhlala emakhaya bazokwaziswa usuku abayobuya ngalo.

Okunye kube wudaba lokuthi iSABC ayikasayini isivumelwano esisha nalo mdlalo.