Angase adlelwe umuzi owaduma kwiKaizer Chiefs

ZITHANDA ukubhimba izinto kowayengumdlali weKaizer Chiefs okuvela ukuthi usengcupheni yokudlelwa isithabathaba somuzi ngenxa yesikweletu sikaR400,000.

U-Abia Nale (38) ubhekene nezinkinga zemali futhi kubikwa ukuthi umuzi wakhe kanokusho oseVanderbijlpark eGauteng ungase umlahlekele.

Ngokombiko wakwaNews 24, usembangweni wezomthetho neStandard Bank mayelana nesikweletu esimhlulayo esingaphezu kuka-R400,000.

UNale, owagqama ngemuva kokujoyina iKaizer Chiefs esuka kuGolden Arrows ngo-2009, udlale imidlalo engu-81.

Wahlohla amagoli ayisikhombisa kulezi zinkunzi zaseSoweto. 

Umsebenzi wakhe wawuhlanganisa nokubolekwa ku-Ajax Cape Town nakuMpumalanga Black Aces.

Waphinda wagijima kwiMaritzburg United, Platinum Stars neBizana Pondo Chiefs ngaphambi kokubeka ethala.

Nokho-ke impilo ngemuva kwebhola ibukeka ilethe izinselelo ebezingalindelekile. 

Ngokwemibiko, lesi sikweletu sisukela kwi-overdraft ayithathe e-Standard Bank

. 
Ngaphambilini uNale uvumile ukuthi uzokhokha u-R21 000 ngenyanga ukuze akhokhe le mali kodwa wehluleka wukukhokha.

Ibhange libe seliqala inqubo yokuthi impahla yakhe esezingeni eliphezulu idayiswe ukuze kubuyiselwe imali esele.