Wesule isigubhukane kwiMK obhekene nezinsolo zokubulawa kwenkosi yakwaXimba

SESULE isigubhukane isishabasheki seqembu loMkhonto Wesizwe Party esisolwa ngokuba ngubhongoza ecaleni lokufa komfowabo inkosi yakwaXimba.

UDuncan Patrick Mzamo Mlaba (63) uvele kafushane eNkantolo yeMantshi eCamperdown ngoLwesihlanu kulandela ukubalwa njengomunye wabasolwa ecaleni lokubulawa kwenkosi uZibuse Mlaba.

Inkosi uMlaba yadutshulwa yabulawa yizinkabi ngo-October 21, 2021.

Ezivuthayo Emaputaland zidalule okokuqala ngqa ngalolu daba nezigameko ezandulela ukwesula kukamsolwa.

UMlaba onguMhlanganisi weMKP ku-ward 1 kwaXimba, wesule ngemuva kokuzinikela emaphoyiseni ngoLwesine.

Ukuzinikela kwakhe kulandele ngemuva kokuthi uFortune Dlamini (29) waseGeorgedale eHammarsdale emkhombe njengomunye wababe neqhaza ekufeni kukaMlaba.

UDlamini uvume abesolwa ngakho maqeda ‘wacula’ edalula konke akwaziyo kuhlananisa negama likamfowabo wenkosi.

Inkantolo ibe isigweba uDlamini iminyaka engu-18 ebhadla ejele.

Umsolwa kulindeleke avele phambi kwenkantolo kulalelwe isicelo sakhe sebheyili ngo-April