I-DA ifuna izimpendulo ngokunyamalala kwezindaba zesiBhunu
BAZITHINTELE iziqandu abakwaSABC2 ngokunyamalala kwezindaba zesiBhunu kulesi siteshi.
Lokhu sekwenze iubuholi beDemocratic Alliance (DA) ne-AfriForum bafune izimpendulo ezisheshayo ngalokhu nazo izindaba zibuyile.Okhulumela iDA kuzwelonke uWillie Aucamp uthe :
“Ukunyamalala kungazelelwe kwezindaba zesiBhunu ngempelasonto edlule, ngaphandle kwesizathu, kuyakhathaza.”
Uthe i-DA ifuna i-SABC inikeze incazelo ngokushesha ngokuthi kungani lo zingasakazwanga.
U-Aucamp uqhube wathi i-DA izobhalela i-SABC ukuze ithole izimpendulo ngokushesha ngalolu daba.
Uthe lo msakazeli womphakathi kuzomele uqinisekise ukuthi bonke abantu baseNingizimu Afrika bayaqhubeka nokuthola izindaba ezithembekile nezifike ngesikhathi.
“Kubantu abaningi baseNingizimu Afrika, i-SABC Nuus ku-SABC2, enababukeli abazinikele abangaphezu kuka-300,000, ibiwumthombo obalulekile wezindaba nolwazi,” kusho u-Aucamp.
Ithe : “Bonke laba babukeli kufanele bakhokhele amalayisensi abo kamabonakude, akwamukelekile neze ukuthi i-SABC ingakhombisa ukungabi nandaba nengxenye enkulu kangaka yabantu.”
Ngokufanayo, i-AfriForum ithembise ukuthi izobhekana neSABC.
Encwadini ethunyelwe usihlalo, isikhulu esiphezulu nabaphathi beSABC, i-AfriForum ifuna incazelo.
“Ukuthola ulwazi olubalulekile ngolunye lwezilimi ezisemthethweni zezwe yisona sizathu esibaluleke kakhulu sokuba khona kwe-SABC,” kusho inhloko ye-AfriForum, u-Alana Bailey.
Uqhube wathi abalaleli bolwimi lwesiBhunu bathembekile futhi banamandla ngokwezimali.
“Cishe ingxenye yesithathu yemakethe isiBhunu. Lokhu kwenza kungaqondakali ukuthi i-SABC ikhetha ukuhlakaza le makethe,” kusho uBailey..
“Akubona abakhuluma isiBhunu kuphela, kodwa nabakhuluma izilimi zezinye izilimi ezincane kuleli sekunesikhathi eside bengagculisekile ngezindaba ezisakazwa ngezikhathi ezinzima, ” ephetha.
