ISilo samaZulu sizungezwe yizethenjwa esizweni sakwaZulu
ISilo samaZulu uMisuzulu kaZwelithini siqoke inkosi uZuzifa Buthelezi, indodana kaNdunankulu wesizwe samaZulu ongasekho, iNkosi Mangosuthu Buthelezi, njengoSihlalo woMkhandlu kaZulu.
Asigcinanga lapho njengoba Isilo siphinde saqoka uMntwana uThulani Zulu, kwesokuba ngokhulumela iNdlunkulu kaZulu.
Lezi zinqumo ezinqala nezithokozise abaningi zimenyezelwe emcimbini obuseThekwini ngoLwesithathu ekuseni.
Lesi kube yisinyathelo ezithathwa ngabaningi njengezimqoka esizweni.
Lokhu kuqokwa okubalulekile kuza ngesikhathi abasendlunkulu bezilungiselela ukuhlangana neNdlulamithi ngoLwesine ukuzama ukunqanda ukungezwani okuphakathi kwayo nezingane zakubo.
Okwenze kwasobala ukuthi kunoqhekeko endlunkulu kube wukuputshuka kwezwi eliqoshiwe lapho iSilo sihilizisane nomunye wodadewabo.
Ukubekwa kwalaba kuqinisekiswe nguMntwana uThulani othe ubizwe ukuthi eze eThekwini watshelwa efika ukuthi uyabuyiswa njengomkhulumeli wenkosi.
“Kube yisimanga ngoba akekho owayeke wangitshela ukuthi kungani inkosi ifuna ukungibona,” usho kanje.
Phambilini uMntwana uThulani uke waphatha lesi sikhundla ngaphansi kweSilo esebuzayo uGoodwill Zwelithini.
Uphinde wasiphatha lesi sikhundla sekubusa iSilo uMisuzulu isikhashana ngaphambi kokuthi amemezele ukuthi useyasula ngo-2022.
