Kubhekene ingwe nengonyama phakathi kweChina ne-USA ngolwentela

UKUBAMBANA ngezihluthu kwempi yezomnotho kubukeka kuthatha elinye igiya njengoba iChina isiveze ukuthi izolwa kuze kube sekugcineni.

Lokhu kushiwo iKhomishana yeNtela yoMkhandlu kaZwelonke eChina kwisitatimende sakamuva.

Isitatimende siqhuba sithi  ” Noma i-United States ingakhokhisa intela ephezulu kangakanani, angeke iphinde ibe nomqondo kwezomnotho futhi ekugcineni iyogcina yehlile. 

Lokhu kuzokwenza i-USA iphenduke ihlaya emlandweni womnotho womhlaba.”

Siqhuba sithi ” Njengoba sekuvele kungenakwenzeka ukuthi imakethe yaseChina yamukele imikhiqizo yase-USA ezingeni lamanje lentela.

Uma i-USA yengeza intela i-China izokuyiziba.” Nokho, uma i-USA iphikelela nokubukela phansi i-China, sizothatha izinyathelo eziqinile futhi silwe kuze kube sekugcineni, ” kuphetha iChina.

Lokhu ngemuva kokuthi iChina imemezele ukuthi izogixabenza i-USA ngentela ka-125%.

Le ntela yentengo engaka izoqala ukusebenza ngokusemthethweni kusasa.

Lokhu kuza ngemuva kokuthi i-USA ithe jize intela enyusiwe yangu- 145% izolo.

Lo mnqakiswano wentela usufike ezingeni la kubhekene khona ingwe nengonyama phakathi kwe-USA neChina.

Okwamanje akucaci ukuthi iyiphi ezogoba uphondo njengoba umengameli wase-USA ethi ulinde iChina imncenge bazokhuluma ngale ntela.

IChina yona ngeke ikwenze lokho. 

Okungcono iyofela empini nokuba yisiyoyoyo sebhoklolo eliyi-USA.

Ububhoklolo be-USA sekwenze amanye amazwe anquma ukudikila ukuthenga imikhiqizo yakhona. 

Amazwe asekhaleni lalo mshikashika kubalwa iCanada namanye asezwenikazi i-Europe.