Kuzolalelwa isicelo sebheyili ngelokubulawa kwenkosi yakwaXimba
UVELA namuhla ekuseni enkantolo yesuFunda eCamperdown umfowabo wenkosi yakwaXimba eyasocongwa yizinkabi.
UDuncan Patrick Mzamo Mlaba (63) obekade eyisishabasheki seqembu loMkhonto WeSizwe uyovela ngenhloso yokuthi kulalelwe isicelo sakhe sebheyili.
Usule esikhundleni abenaso kwiMK engaphakathi eboshiwe njengoba elinde lolu suku lwanamuhla lwesicelo sebheyili.
Uke wavela kafushane ngoLwesihlanu olwalandulela uLwesine ayezinikele ngalo emaphoyiseni.
Umsolwa uzithola ephambi kwemantshi nje, kungenxa yokubalwa njengongqondongqondo ekuthungweni kwetulo lokusocongwa kwenkosi uZibuse Mlaba.
Lezi zindaba ezishaqisayo zavezwa wuFortune Dlamini (29) waseGeorgedale eHammarsdale okumanje ugwetshwe iminyaka engu-18 ngaleli cala.
UDlamini wavele wathulula amakati esakeni, waveza konke ayekwazi ukusuka nokuhlala kwaleli cala.
Wakhomba ngenjumbane umfowabo wenkosi njengomsolwa oqavile.
Wakwenza lokhu ngokubhala isitatimende esifungelwe nesafundwa ngummeli wakhe uMfuneko Jwili ngaphambi kokuthi agwetshwe iminyaka engu-18 ebhadla ejele.Â
Inkosi uMlaba yayithandwa zindimbane zabantu bakwaXimba namaphethelo ngenxa yobumnene benhliziyo nokukhathalela umphakathi.
UMlaba wake waba yiphini likaSihlalo we-ANC esifundazweni ngesikhathi owayenguMengameli wezwe uJacob Zuma enguSihlalo.
Inkosi yadutshulwa yabulawa yizinkabi ngo-October 21, 2021, ngaphambi kwehhovisi lakhe.
Abanye abasolwa kanye nomfowabo wenkosi ecaleni lokubulala uMlaba, okunguMthobisi Tsebang Dubazana (30) waseMlazi noNhlanhla Lungelo Hlongwa (30) waseMasukwana eMgungundluvu, kulindeleke bavele ngoMay ukuze baqulwe icala labo.
