Injabulo kumenyezelwa ukubuya koweSizok’thola kuMoja Love

UKHUZA ibuya kuMoja Love umethuli wezinhlelo oke wasematheni ngohlelo  iSizok’thola.

Lesi simemezelo senziwe ngabakwaMoja Love ngemuva kokuhoxiswa kwamacala uXolani weSizok’thola abebhekene nawo.

Lama cala ahoxiswe yinkantolo kamantshi ePalm Ridge eGoli.

Lesi siteshi sikhiphe isitatimende esiveza ukuthi uKhumalo uzobuya ngesizini yesine yalolu hlelo. 

OyiNhloko yesiteshi seMoja Love, uLivhuwani Dagada, uzwakalise ukujabula ngokubuya kukaXolani.

UKhumalo uke wasematheni ngenxa yesinye sezigameko esigcine simfake enkantolo. okuthiwa senzeka ngesikhathi beqopha uhlelo iSizok’thola.

Ugcine ebhekena namacala okubulala, ukugebenga nokucekela phansi impahla ngemuva kwalesi sigameko.

Lokhu kungenxa yesigameko sangoJuly 2023 eKatlehong, empumalanga yeGoli. 

Kulapho uKhumalo nethimba lakhe bathweswa icala lokushaya uRobert “Kicks” Varrie, owabesolwa ngokudayisa izidakamizwa owashona kamuva.

UVarrie wagcina ngokushona nokwasolwa uKhumalo nethimba lakhe ngakho.

Ithimba lakhe labameli eliholwa ngu-Advocate Zola Majavu, belimile ekutheni uKhumalo umsulwa.

NgoMsombuluko uPhiko lezokuShushisa kuleli liwahoxise wonke amacala abebhekene noKhumalo.

Nakuba lolu hlelo ludume ngokudalula izidleke zezidakamizwa kanye nokubamba abasolwa ngokudayisa, isigameko sango-2023 sawuphazamisa ngokuphelele umsebenzi kaKhumalo.

Lesi sigameko saholela ekuboshweni kwakhe nokuxoshwa kwakhe kuMoja Love.

UKhumalo nethimba lakhe kwiSizok’thola, lizakhele udumo ngokulwa nobugebengu nokubhekana ngqo nenkinga yezidakamizwa emiphakathini.

Lo methuli oyisidlakela, uthe nengoba ebuya uzosebenzisana nezinhlaka ezahlukene zomthetho ezweni lonke ukulwa nenkinga yezidakamizwa.

“Ngiyabonga ngokubuyela eMoja Love, le ndawo iyikhaya lami,” kusho uKhumalo.