Owayengunozinti weBhakabhaka ugoloza ukuphuma endaweni ayiqashile
LOWO owayengunozinti we-Orlando Pirates, uWilliams Okpara, uyagoloza ukuphuma ebhilidini aliqashile.
Lokhu ngemuva kokuthi umnikazi wendawo emcele ukuba aphume ngenxa yokuhluleka ukukhokha irenti.
ISunday World ibika ukuthi ukwenqaba kuka-Okpara ukuphuma emagcekeni esitolo kuJeppe Street, eGoli.
Lesi sigameko senzeke ngemuva kokuthi abanikazi bebhilidi, i-Afhco Holdings, benqamule ugesi esitolo sakhe.
Ngenxa yalo mdonsiswane i-Afhco isifake amaphepha eNkantolo eNkulu yaseGoli ngenhloso yokukhipha u-Okpara ebhilidini.
Emaphepheni asenkantolo abonwe yileli phephandaba, i-Afhco ithe yenza isivumelwano sokuqashisa esibhalwe phansi nabakwa-Okpara sokuqasha isitolo eMpilo Place ngoSeptember 14, 2020.
Isivumelwano sokuqashisa bekufanele siqale ngo-October 1 siphele ngoSepthemba 30.
U-Okpara, ngokwamaphepha, bekulindeleke ukuthi akhokhe imali engaphezu kuka-R12 000 ngosuku lokuqala njalo enyangeni.
Idiphozi yokuqasha i-R18 960.
Ukwengeza ekuqashisweni kwanyanga zonke, u-Okpara wazibophezela ukukhokha u-0.65% wesamba sentela.
Le mali ihlanganisa izindleko zendawo amanzi nogesi.
“Ngokwephula izibopho zakhe ngokwesivumelwano sokuqashisa, ummangalelwa wehlulekile, washaya indiva futhi noma wenqaba ukukhokha ngesikhathi.
Ngaphandle kokuphelelwa yisikhathi njengoba kushiwo encwadini eshiwo ngenhla, ummangalelwa wehlulekile futhi noma wenqaba futhi/noma wadebeselela ukukhokha kummangali imali ayeyikweleta ngaleso sikhathi,” kufundeka amaphepha.
Le nkampani ithe abameli bayo babhalela u-Okpara enye incwadi ngo-October 30, 2023, bemazisa ngokuhoxiswa kwesivumelwano sokuqashisa nokumyala ukuba aphume esitolo.
“Ngokunjalo, isivumelwano sokuqashisa phakathi komfakisicelo nommangalelwa sesihoxisiwe ngokusemthethweni.
Naphezu kwesidingo, ummangalelwa wehlulekile futhi/noma wenqabile futhi/noma uye wadebeselela ukuphuma kule ndawo eshiwo ngoNovember 13, 2023,
Ngenxa yalokho, kusukela ngoNovember 14, 2023, ukusebebnzisa le ndawo eqashwe ngummangalelwa akukho emthethweni,” kufunda amaphepha.
Encwadini yakhe efungelwe ephendula, u-Okpara ukuqinisekisile ukuthi i-Afhco yasihoxisa isivumelwano sakhe sokumqashisa ngemuva kokwehluleka ukukhokha irenti.
U-Okpara uthe ngesikhathi ethola amasamanisi enkampanini, wavele waya emahhovisi ayo wenza izinhlelo zokuyikhokha leyo mali esilele emuva.
Uthe ummeli wenkampani wameluleka ngokuthi akhiphe inkokhelo ukuze avimbele ukuqhubeka kwezinyathelo zomthetho.
“Ngakhokha u-R20 000.00 ku-akhawunti kammangali njengesenzo sokuzibophezela,” kusho u-Okpara.
“Sengiphetha, ngiqinisekisiwe ukuthi inqobo nje uma ngikhokha, azikho ezinye izinyathelo zomthetho ezizothathwa.”
U-Okpara uthe akazange ayithole incwadi yokuhoxiswa.
Ngakho-ke amasamanisi nezinhlelo zokuxoshwa kwakungakabi yisikhathi, futhi icala le-Afhco elibekwe yena kufanele lichithwe kanye nezindleko.
Ukhale ngokuthi ngaphambi kokumyisa enkantolo, i-Afhco imvalele ngaphandle kwesitolo sakhe ngaphandle kwencwadi yenkantolo.
“Bavala ibhizinisi kusukela ngomhlaka-17 April 2024 kuya ku-18 April 2024.
Ngenxa yalokho ngalahlekelwa amakhasimende engangingase ngibe nawo nemali engenayo ngalezo zinsuku.
“Ukulahlekelwa yimali engenayo ebhizinisini elincane njengelami kukhulu, ngithembele emahoreni okuhweba phakathi nezinsuku zokusebenza ukuze ngizame ukwenza imali eyanele ukuze ngigcine izibopho zami zanyanga zonke.
“Abameli bami bamanje babhalele abameli bommangali ngokushesha incwadi becela ukuvulwa kwebhizinisi ngokushesha,” usho kanje.
U-Okpara uphinde wasola le nkampani ngokusebenzisa amaqhinga okuhlukumeza ukumsabisa ngokucisha ugesi ngamabomu.
“Kukanye nje ngivakashele emahhovisi abo lapho ummangali evuma ukuxhunywa kabusha ugesi.
Lokhu sekwenzeke izikhawu ezimbili ezihlukene, futhi kulindeleke ukuthi lokhu kuziphatha kuzoqhubeka.”
Uthe uma exoshwa uzolahlekelwa yibhizinisi nemali engenayo.
“Ummangali ufuna ukungixosha endaweni yami yebhizinisi esengilibambe iminyaka engu-9 edlule,” usho kanje.
Ngesikhathi ethintwa, u-Okpara uzibe izingcingo nemiyalezo.
U-Okpara ungomunye wezinkakha ezizakhele igama kokanobhuntshuzwayo ngesikhathi eyibambe ishinsha kwi-Orlando Pirates,
Igama lakhe libalwa nawabanye a badlali abahlezi behlonishwa ngenxa yamagalelo akhe ebholeni.
