Liyaqala ukuqulwa elokubulawa kukathisha waseSkhethuxolo
LIYAQALA ukuqulwa icala namuhla icala lomlisa osolwa ngokudutshulwa okwaholela ekufeni kowayebambe kwesobuthishanhloko eSikhethuxolo High School eMpumalanga Township eHammarsdale.
Umsolwa oneminyaka engu-28 okumanje uboshiwe, ubanjwe ngecala lokudutshulwa kubulawe uBusani Khomo.
Ngokombiko wamaphoyisa, umsolwa uboshwe ngenyanga edlule kanti wayenqaba ibheyili.
Uqale ukuvela enkantolo ngoMashi 12 nonyaka kanti uphenyo lwamaphoyisa luqagula ukuthi kusaboshwa nabanye kungekudala.
UKhomo (57) wabulawa ngoDecember 5 ngonyaka owedlule, ephuma emagcekeni esikole kade eqeda umsebenzi wesikole sekuzovalwa nezikole.
Lesi sehlakalo senzeka esanda kungena emgwaqeni uSofasonke, wadutshulwa washona.
Imithombo ethembekile isiveze ukuthi kungase kube khona amalungu omphakathi azohambela lenkantolo ekaWebber, ngenhloso yokuyokweseka umndeni kamufi.
Kuzokhumbuleka ukuthi uKhomo ubengumuntu wabantu nosomabhizinisi ohlonishwayo eMpumalanga namaphethelo ngenxa yobumnene nothando abenalo kwakwenzayo.
Konke lokhu kumenzele ugazi kubantu abephilisana nabo.
Phambilini umbiko wamaphoyisa aveza ukuthi le mpumelelo yamaphoyisa idalwe wukubambisana nobuqotho kwawo nophiko lwamacala abucayi nodlame esifundazweni lunikezwe idokodo lokubulala ukuze lubheke kabanzi.
Phambilini, uCaptain Ntathu Ndlovu, okhulumela amaphoyisa, wacashunwa ethi: “NgoMarch 11, amaphoyisa aqhuba umkhankaso wobunhloli elokishini laseMpumalanga, nokuholele ekuboshweni komsolwa.
“Umsolwa oneminyaka engu-28 ubudala uboshwe ngemuva kokuthi abaseshi benze uphenyo olunzulu.”
“Kuthathwe nebhulukwe amaphoyisa akholelwa ukuthi umsolwa wayeligqokile ngesikhathi enza ubugebengu.
“Umsolwa ubhekene necala lokubulala wabe esevela eNkantolo yeMantshi yaseHammarsdale ngoMarch 12, 2025.
Kusaphenywa ngaleli cala, kusazoboshwa abanye abantu.”
Okhulumela uphiko lwezokushushisa KwaZulu-Natal, uNatasha Ramkisson-Kara, uthe: “Icala lihlehliselwe u-Ephreli 17 ukuze kuqhutshekwe nophenyo.
Umsolwa owasichitha isicelo sakhe sebheyili ubhekene necala lokubulala.”
Ukuhamba emhlabeni kukaKhomo kukhalise kakhulu umphakathi ngenxa yokwazi amagalelo akhe kule mboni.
Phakathi kwezinto ayehlezi akhunjulekwa zona wukufukula izinga lokuphasa esikoleni iSikhethuxolo.
Ngesikhathi engena njengebamba kuvela ukuthi lesi sikole besinemiphumela kamatric ecela ku- 61.9%.
Ukungena kwakhe kwenyuse izinga layoshaya ku-94.5% nokwenze iSkhethuxolo sabalwa nezikole ezenze kahle kuleli lokishi.
Ukuhamba kwakhe emhlabeni kusabhekwe lukhulu, kugqeme udume lwengozi umphakathi nemboni abesebenza ngaphansi kwayo yokufundisa.
