UMkhonto WeSizwe usithele kwezwakala isibhaxu eThekwini
KUQHUMA isililo kwabangakakholwa wukuthi iqembu uMkhonto WeSizwe Party lizidlele amahlanga okhethweni lokuchibiyela eThekwini kuWard 110.
UMkhonto WeSizwe Party utalabhe iDemocratic Alliance (DA) yayikhipha esizindeni sayo ngomehluko wamavoti angu-22.
Konke lokhu kwenzeke eThekwini nokuyilapho leli qembu eliholwa ngowayengumengameli wezwe uJacob Zuma beliqala ukunqoba kwiMetro.
II-MKP ithole amavoti angu-2 435 ihlula iDA, ethole amavoti angu-2,413.
I-ANC iphume isithathu ngamavoti angu-966 endaweni eyake yaba yisizinda sayo.
UMandla “Motaung” Biyela we-MKP nguye osezothatha izintambo njengekhansela elisha kuWard 110.
Phambilini le wadi ibiphethwe yi-DA kanti ihlanganisa iPhoenix, Mount Royal, noMhlanga enyakatho yedolobha iTheku.
Amanye amaqembu abengenele lo mqhudelwano kubalwa i-EFF, athole amavoti angu-14 kuphela, kwathi iNFP yona yahlomula ngamavoti awu-9.
I-IFP ne-ActionSA abalungenelanga lolu khetho lokuchibiyela.
Selokhu kuvele imiphumela, kuyachwaza ezinkundleni zokuchumana.
Lokhu kungenxa yenjabulo leli qembu liqophe umlando kanti abanye abahlala kule ndawo abakholwa wukuthi kunqobe leli qembu.
Ekhasini eligcwele uhlanga oluthile kuhlale obala ukuthi kunabangahambisani nezinguquko.
Okubadina kakhulu yinamba yesibalo samavoti abe ngumehluko phakathi kweMKP neDA angu-22.
Nakuba kunjalo, iMKP ikhiphe isitatimende ibonga kwabavotile nabayesekile okhethweni lokuchibiyela olube yingqophamlando.
Umkhulumeli we-MKP, uNhlamulo Ndhlela, ubhalele u-X (owayengu-Twitter) wathi: “UMkhonto WeSizwe Party uphinde wakufakazela ukuthi i-DA nebambisene nabo kuhulumeni wobumbano bayinhlekisa, amanga amakhulu nabangabameli abantu bakithi ezweni lonke.”
Umzuliswano olandelayo wokhetho lokuchibiyela uzoba seMandeni, enyakatho neKZN ngo-April 30.
Le ndawo isiphenduke enye yezindawo ezinabantu abeseka kakhulu i-MKP.
I-MKP yasungulwa ngo-2023 futhi yangenela ukhetho lukazwelonke ngonyaka odlule.
Yakwazi ukuzuza izihlalo ezingu-58 ePhalamende likaZwelonke, elinezihlalo ezingu-400.
KwaZulu-Natal, okuyisizinda esiqinile se-MKP, iqembu lithole izihlalo ezingu-37 esiShayamthetho sesifundazwe, lathola izihlalo ezingu-80.
