UMotsepe unikele ngoR200 million emqhudelwaneni wabafundi

SISHAYELWE izandla isenzo sempunyela ephinde ibe nguMengameli weCAF sokunikela ngesamba semali engu R200 million.

UDr Patrice Motsepe, ngaphansi kweMotsepe Foundation ugile izimanga enikela ngalesi samba kwiCAF African Schools Football Championships yalo nyaka.

Kulesi sigaxa semali kubalwa nezobhekela ukuzoklonyeliswa ngayo imiqhudelwano yabafana namantombazane emidlalweni yabafundi

Le mali ihlanganisa u-R6-million kwabazonqoba. 

Abazolala isibili bazohamba noR4 million kuthi abazoba yisithathu bahambe no-R3 million.

Kulo nyaka amaqembu ezikole akuleli azibuyela kule midlalo.

Kuzobe kungunyaka wesithathu ilandelana edlala kowamanqamu kulemidlalo yalapha e-Afrika.

Lo mqhudelwano uzosingathwa e-Accra, eGhana, kusukela ngoMsombuluko, April 21 kuya kumhlaka 26. 

Ngenxa yale midlalo, iGhana isiphenduke isizinda zokuthuthukiswa kwelikanobhutshuzwayo yabasakhula.

Ubufakazi balokhu wukugqama kwabasha abake babamba iqhaza kule midlalo.

Phakathi kwalawo mazwe kubalwa abaqhamuka akulelizwekazi lase-Afrika, okubalwa kuwona iSenegal, i-Ivory Coast, i-Algeria, i-Ivory Coast, Uganda neDemocratic Republican of Congo (DRC)

Ngaphandle kwebhola labafana, namaqembu amantombazane azobhekana nezinselele ezifanayo.

Okwamanje umlando weqembu lamantombazane alapha eNingizimu Afrika alinachashazi.

Ukunikela ngemali engaka kwenze kwanenjabulo kwabaningi.

Le njabulo ingenxa yokubonakala ekhombisa ukukhathalela intsha engene shi kwezemidlalo.

Ohlwini olusanda kukhishwa lwezicebi zakuleli, uMotsepe ulele isithathu ngmcebo awenze ngokuba nezinkampani zezimbiwa phansi.

Umcebo wakhe kuleli sonto ulinganiselwa ku-R3 billion.

UMotsepe welama uNicky Oppenheimer onomcebo olinganiselwa kuR10 billion kuthi esicongweni kube wuJohann Rupert noR12,7 billion.