Indida kuntshontshwa izidumbu ezintathu emakhazeni
Sekukhishwe umehlokaboni ka-R100 000 kongaba nolwazi olungaholela ekuboshweni nasekugwetshweni kwalabo abathinteka ngokweba izidumbu ezintathu enkampanini.
Lesi sigameko sishiye umphakathi ushaqekile nemindeni ethintekile ilila ngenxa yokwebiwa kwezidumbu.
Ngokombiko we-OFM News, lesi sigameko senzeke eKuruman eNorthern Cape.
Selokhu kubikwe ngalesi sehlakalo amaphoyisa aqinise imizamo yokuxazulula leli cala elinzima.
Lesi sigameko senzeke ekuseni ngoMarch 17, kulo nyaka entathakusa.
Ngokusho kokhulumela amaphoyisa uColonel Cherelle Ehlers, izidumbu zabesilisa ababili abadala, abaneminyaka engu-37 no-60 ubudala.
Esesithathu esengane encane enezinyanga eziyishumi ubudala.
Zonke lezi zidumbu zebiwe emakhazeni akwaMotheo wa Bophelo.
“Amaphoyisa ayaqhubeka nophenyo mayelana nokugetshengwa kwebhizinisi okwenzeke emakhazeni azimele eKuruman,” kusho uColonel Ehlers.
“Ngalolu suku okukhulunywa ngalo kwangena amadoda angaziwa egunjini lokulinda lasemakhazeni.
“Abasolwa bashaya, babopha maqede bavala amehlo unogada ngaphambi kokuba babaleke nezidumbu ezintathu.”
Lezi zidumbu ezebiwe bekuhlelwe ukuthi zingcwatshe ngalo lolo suku.
Kuze kube yimanje zontathu izidumbu azikatholakali.
Ukwebiwa kwazo kushiye imindeni yabashonile isosizini, njengoba bengakwazi ukubabeka ezindaweni zabo zokugcina ngokuthula.
Umnikazi wendawo yabangcwabi uzwakalise ukuphatheka kabi ngalesi sigameko, wasichaza “njengesingenabo ubuntu”.
Uthe sihlukumeze kakhulu imindeni eshonelwe, abasebenzi kanye nomphakathi wonkana.
UColonel Ehlers ukugcizelele ukuphuthuma kophenyo wabe esecela usizo lomphakathi.
“Umklomelo ka-R100 000 ukhishwa ngamaphoyisa kunoma yimuphi umuntu ongasiza ekuboshweni nasekugwetshweni kwabenzi bokubi noma abenzi bobubi kanye nokutholwa kwezidumbu,” usho kanje.
Abomthetho balandela umkhondo, kanti abaphenyi basebenza ngokuzikhandla ukwenza isiqiniseko sokuthi kwenzeke ubulungiswa.
Amaphoyisa anxusa noma ngubani ongaba nolwazi oluthinta lobu bugebengu ukuthi aphumele obala.
Abangaba nolwazi bangathinta uLieutenant Colonel Doggy Magugu ku-082 469 0578 noma bashayele inombolo yeCrime Stop ku-08600 10111.
