INewzroom Afrika imise umethuli wezinhlelo osolwa ngokushaya

INewzroom Afrika isimemezele ukuthi umethuli wezindaba u-Aldrin Sampear uzohoxa okwesikhashana emsebenzini wakhe.

Lesi simemezelo singenxa yesigameko sokubonakala kwivideo ehilizisana nowesifazane 

esigamekweni esenzeke eRandburg ngoLwesine olwedlule.

U-Aldrin, uzolinda ekhaya njengoba kusalindwe ukubuyekezwa kwangaphakathi, ngenxa yezinsolo zokushaya zakamuva.

Esitatimendeni esikhishwe yiNewzroom Afrika, izibophezele ekuphenyisiseni lezi zinsolo njengoba ithi izibona zibucayi.

” Lezi zinsolo zibucayi futhi sizosebenza ngokukhulu ukushesha ukwenza isiqiniseko sokubhekisisa lolu daba,” kusho iNewzroom Afrika.

U-Aldrin uvulelwe icala lokushaya ngenxa yalesi sigameko.

Icala livulwe ngumfundi uLaricia Augusto (20) waseGoli.

ULaricia Augusto, ucashunwe kwiCitizen ethi wayeya enyuvesi ku-Jan Smuts Avenue ngesikhathi sesigameko.

“Ngangikulayini wesokunxele, kanti yena ubehamba ngesivinini ngemuva kwami ​​kwesokudla. 

Uthe ukuma kwetekisi eyayihamba phambi kwakhe kwadala ukuthi abuyele kwesokudla.

Uthe ngaphambi kokwenza njalo wenza uphawu lokuya ngakulolu hlangothi.

Ngalokhu uthi wakwazi ukumphephisa u-Aldrin njengoba ayehamba ngesivinini.

Uqhuba uthi : ” Wavele wanamathela kubhampa wami, ememeza ngentukuthelo. 

” Ngangingazi ukuthi inkinga yakhe yayiyini, kodwa ukuze ngigweme umsindo, ngabuyela emzileni wesobunxele ukuze ngimvumele adlule. 

” Yilapho-ke izinto zaba zimbi khona.”

Uthe okwadala ukuphakamela kemimoya kwaba wukwehla kuka-Aldrin emotweni ememeza ediniwe.

Lo wesifazane usola u-Aldrin ngokumbambha ngengalo nokumphusha esifubeni. 

Lokho kwamenza wanovalo lokuthi angahle amlimaze.

Okunye athi kwacika u-Aldrin wukuthi wamphakamisela umunwe ophakathi nendawo.