Yenze edume ngakho iMK Party inqoba eMandeni

ULOKHU ‘ugwaze’ njalo uMkhonto WeSizwe Party kwamanye amaqembu ezepolitiki.

Izolo iMK Party iphinde yanqoba enye iward ebiphethwe uKhongolose phambilini okungu- ward 18 eMandeni.

IMK inqobe ngamavoti angu-813 (41,89%) yalandelwa ezithendeni yi-IFP ethole amavoti angu-575 (29,62%).

I-ANC ebivikela isithunzi sayo kule ndawo njengoba ike yayiphatha, ithole amavoti angu-533 (27,46%).

Njengokulindelekekile i-EFF kube yiqembu lezepolitiki ebelingenzi kahle kunawo wonke njengoba lithole ingcosana yamavoti angu-20.

La mavoti angu-20 alulazayo abehlanganisa okutholwe kuzo zontathu iziteshi zokuvota sezihlangene.

Ukunqoba kweMK Party kusho ukuthi le ward isizophathwa uLindani “King Dane” Xhakaza (osesithombeni).

I-ANC ibiye kulolu khetho nezinhliziyo ezibhibhayo njengoba yayiphethwe yilungu layo elabulawa ekuqaleni kwalo nyaka uPhendukani Mabhida.

UMabhida ushone ezingeni ezintathu ezedlule edutshulwa nesihlobo sakhe esalimala kanzima.

Lokhu sekungokwesithathu kulandelana iMK Party KwaZulu-Natal inqoba iwadi eRichmond naseThekwini.

Umbiko we-IEC uveza ukuthi kulolu khetho bekubhalise abantu abangu-4,062, kwavota abangu- 1,957.

Kulawo mavoti kube sekutholakala ukuthi kunangu-16 amoshiwe.