Ugqunywe ejele obhekene nelokuthumba usana
USAZOTHI gozololo esitokisini owesifazane obhekene nezinsolo zokuthumba usana.
Lokhu kulandela umyalelo weNkantolo yeMantshi eThekwini ethe akathi ukuhlala izinsukwana etokile ejele eWestville njengoba amaphoyisa esaqhubeka nophenyo.
Abaseshi base-SAPS Cato Manor Family Violence, Child Protection and Sexual Offences Unit (FCS) bacele ukuba umsolwa agqunywe ejele izinsuku eziyisikhombisa.
Udaba lalo wesifazane lube sematheni ngemuva kokuba ebanjwe wuphiko lwabezokuvikela lweReaction Unit South Africa.
Udaba lokuthunjwa kosana u-Owami Lonathando Sindane lwethuse abaningi njengoba esanamasonto amabili vo ezelwe.
Kulolu daba abakwaRUSA balandele umkhondo womsolwa owayekhonjwa elokishini eChesterville ngoMsombuluko ekuseni.
Ngokombiko, umsolwa wabanjwa eluphethe ngezandla usana.Â
Kuvela ukuthi umsolwa ugila leli lumbo nje, kungenxa yokuthi ubesanda kuphuphunyelwa yisisu njengoba ekade ekhulelwe.
Kukholakala ukuthi uthe eseyithumbile ingane wayiyisa kubo kwesoka wathi usebelethile
