Kusolwa i-ANC ngokukhankasa ngemicimbi kahulumeni
Iqembu loMkhonto weSizwe (MK) selifake isikhalo kuKhomishini ezimele yoKhetho (IEC) ngobuholi be-ANC KwaZulu-Natal.
UNobhala-Jikelele we-MK uFloyd Shivambu unameke ku-X wakhe incwadi ayibhalele i-IEC.
Uthe sekufikile kubona ukuthi i-ANC KwaZulu-Natal isebenzisa imicimbi kahulumeni nezidingo zomphakathi ukhankasela ukhetho lokuchibiyela oluzoba ku-ward 4 eMpofana ngoLwesithathu oluzayo.
Usole i-ANC ngokusebenzisa imicimbi kahulumeni ukukhankasa nokugqugquzela abavoti ukuba bavotele uhulumeni we-ANC.
Uveze ukuthi lezi senzo se-ANC senze amalungu oMkhonto WeSizwe Party kulesi sifundazwe, aphoxekile futhi ashaqekile ngalokhu.
Okushiwo uShivambu kuhlale obala emcimbini woMnyango wezeMpilo obuseMpofana lapho kubonakale kuhlonywe namabhodi kaKhongolose.
“EMandeni ku-ward 18 badlulisele umcimbi kahulumeni ewadini ezinsukwini ezine ngaphambi kokhetho futhi basebenzise izinsiza zikahulumeni ukukhankasela i-ANC.
“Sabahlula yize kusetshenziswe kabi izinsiza zikahulumeni. Kumanje benza into efanayo naseMpofana ku-ward 4, bathatha uhlelo lukahulumeni sekusele izinsuku ezine kube nokhetho.”
UShivambu uthe ulindele ukuthi i-ANC isebenzise izindlela zokuziphatha uma ikhankasela ukhetho.
” Woza ngoLwesithathu ngesonto elizayo, uMkhonto WeSizwe uzowina u-ward 4 eMpofana nakuba kunenkohlakalo nemidlalo engcolile eyenziwa yi-ANC,” usho kanje.
