Ikhansela leDA ecaleni lokumuhluza isakhamuzi
LIZOQALA ukuqulwa ngenyanga ezayo icala lekhansela le-Democratic Alliance lokumuhluza isakhamuzi.
UGavin Hegter oyikhansela le DA laku-ward 64 ubhekene necala lokumuhluza ngethoshi emlonyeniÂ
uMncedisi Dlamini (43) eYellowwood Park ngoNovember nyakenye.
Leli cala lihlehliselwe uJuni 11 no-12 eNkantolo yeMantshi yaseThekwini.
Seliqalile ukudonsa amehlo njengoba izolo bekugcwele amalungu oMkhonto WeSizwe Party ezokweseka isisulu.
UHegter ubevele enkantolo izolo.
UHegter usolwa ngokushaya uDlamini ngethoshi emlonyeni kulandela ingxabano okuthiwa iphakathi kwalaba bobabili.
UMncedisi ungumfowabo ka-Alfred Dlamini ongunogada nowayejutshwe ukuba agade umuzi kahulumeni owawungasasebenzi eHoopoe Lane eYellowwood Park.
Ngokwesitatimende esifungelwe esithunyelwe nguHegter kwiDA, uthe ngobusuku bangoNovember 15, kwakunequlu labantu elalinomcimbi eHoopoe Lane.
Encwadini efungelwe uHegter uthe wabiza ilungu lophiko lweCrime Prevention esiteshini samaphoyisa eMontclair ukuze liphenye ngokwenzeka ebhilidini.
Ummeli kaHegter, uZama Xaba, utshele inkantolo ukuthi ummeli wabasolwa uhlela ukubiza ofakazi ababili uma icala liqhubeka ngoJuni, kanti abashushisi bazophinde bethule ofakazi ababili.
Leli cala selivuse izithakazelo zomphakathi njengoba i-ANC kanye noMkhonto weSizwe Party (MKP) befuna ukuba kwenziwe ubulungiswa.
Ngaphandle kwenkantolo, abalandeli be-MK Party bakhombise ukumeseka isisulu.
