Ubanjwe enyangeni osolwa ngokudlwengula abafundi baseBizimali

Ubanjwe enyangeni eyokhendla umlisa osolwa ngokuhlalisa lubhojozi abafundi besifazane baseBizimali High School eNkandla.

Lo msolwa (28) wesilisa okuke kwavela ukuthi weqe esitokisini eMarianhill ngoMsombuluko, usebanjiwe ngamaphoyisa kanti uzovela enkantolo yemantshi ePinetown.

Udaba lwalo msolwa wesilisa selube ngundabuzekwayo.

Ngokwemibiko baningi abafundi abaphumele obala ngokuhlukunyezwa yilo msolwa okuthiwa ungowaseGoli. 

Ukubanjwa kwalo msolwa ngeledlule kube wumphumela wokungenelela komphakathi kanye noseseshini wamatekisi iBhekisiswe.

Lolu daba lungenelelwe nayiziphathimandla zesifundazwe kusukela emnyangweni wamaphoyisa, ezemfundo kanye nabanye abashaqekile ngalesi sehlo.

Namuhla, umphathiswa wezemfundo KwaZulu-Natal nethimba lakhe bavakashele lesi sikole.

Inhloso enkulu kube wukuzokweseka izisulu nokuzama ukubuyisela uzinzo kulesi sikole esehlelwe wumshophi.

Selokhu kwenzeke lomshophi kubikwa ukuthi kunabafundi abebelandwe abazali babo ikakhulukazi labo abangebona abendawo.