Induna yakwaNxamalala ibhekene nelokufa koweDA
IVELE enkantolo induna yesizwe sakwaNxamalala eMpophomeni ngezinsolo zokwakha itulo nokubulala ikhansela leDemocratic Alliance (DA).
UZwelithini Buthelezi (43) uvele namuhla phambi kweMantshi eHowick ngecala lokwakha itulo nokubulala uNhlalayenza Ndlovu.
UNdlovu wabe elikhansela le-DA aphinde abe nguSotswebhu kuMasipala uMngeni.
Wahlaselwa wadutshulwa waze washona emzini wakhe eMpophomeni phambi komndeni wakhe nezingane ngoZibandlela ka- 2023.
UButhelezi uboshwe ngoLwesihlanu olwedlule ngenxa yokuthi selokhu abaleka kusuka ngo-April wonyaka odlule.
Ukuboshwa kwakhe kwenzeke ngemuva kwesikhashana evele enkantolo ngoLwesibili olwedlule ngecala elihlukile elithinta ukutholakala ne-transformer kagesi eyebiwe.
Ngokwamaphepha abekwe icala, uButhelezi ubhekene necala lokwakha itulo lokubulala nelokubulala emzini wakhe oseMvulo.
UButhelezi wayeboshwe ngomhlaka-8 Januwari eMpophomeni ngokutholakala ne-transformer eyebiwe.
Unikezwe ibheyili ka-R1 500, eyabuye yahoxiswa ngemuva kokuthi ebaleke.
Umsolwa uzoqhubeka nokugqunywa esitokisini kanti kulindeleke ukuthi aphinde avele ngoLwesihlanu kanye nabanye abasolwa ababili abayamaniswa necala lokubulala uNdlovu.
