UMalema uyosonta ebandleni lamaNazaretha

KUZOQOPHEKA umlando umholi we-EFF ezokotha inkosi yamaNazaretha aseBuhleni namuhla.

UJulius Malema uzoyodumisa kuleli bandla kwinkonzo yeSabatha yasemini ethempelini eLindantonga kwaNongoma.

Lokhu kuzokwenzeka njengoba nomholi webandla inkosi uMduduzi Nyazilwezulu Shembe ezobe ekhona ukuzosabatha kuleli thempeli.

Ngokwesitatimende saleli qembu, ukubakasha kukaMalema kuleli bandla elikhulukazi eNingizimu Afrika, kuyingxenye yokusondelana nokuzibophezela nobuholi bezomoya namasiko.

Kulapho kukholakala ukuthi kuzoba nezingxoxo nemibono ngezithinta umphakathi jikelele.