Kuyaphela ngogesi womkokotelo

KUZOPHELA amahlathi kwabasebenzisa ugesi ngokuwukokotela kumasipala waseNdumeni.

Lo masipala ngokubambisana nabakwa-Eskom, bazofaka amamitha kagesi amasha kuzona zonke izindawo nazodla imali elinganiselwa ku-R4.6 million.

Lolu hlelo luzoqeda nya ngokwebiwa nokufakwa kukagesi oyizinyokanyoka nokuyinto ephambene nomthetho.

Kudlangile ukwebiwa kukagesi eNdumeni osekwenze isikweletu sika-Eskom sifinyelele cishe ku-R200-million.

Ngenyanga edlule, iziphathimandla zakule ndawo zihlangane nabakwaConlog okuyinkampani yaseThekwini ekhiphe ithenda kaR4.6 million ukuhlinzeka nokufaka amamitha amasha kule ndawo.

Amamitha amasha azoxhunywa nohlelo lokusebenza lweselula, okuvumela izakhamuzi nabanikazi bamabhizinisi ukuba baqaphe ukusetshenziswa kukagesi futhi bathenge ngokuqondile ngama-smartphone abo.