Lihlehlile icala lempunyela nomkayo abazame ukubulala umakhwapheni
LIBUYELA enkantolo ngenyanga ezayo icala likasomabhizinisi osematheni osolwa ngokuzama ukubulala umakhwapheni wakhe.
Icala likaVusumuzi “Cat” Matlala lihlehliselwe u-August 26 lapho losomabhizinisi ehlangene nomkakhe uTsakai Matlala nabanye bebhekene necala lokwakha itulo lokubulala uTebogo Thobejane.
UThobejane ongumlingisi odumile kuMuvhango kuSABC2, usola uMatlala nomkakhe ngokuzama ukumbulala.
UMatlala nabanye abathathu asolwa nabo bavele kafushane eNkantolo yeMantshi yase-Alexandra enyakatho neGoli.
UMatlala usematheni ngenxa yokuvezwa wuLietenant General Nhlanhla Mkhwanazi njengomunye wabasondelene noNgqongqoshe wamaPhoyisa uSenzo Mchunu.
