Uvalo abazalwane begetshengwa esontweni

ASINDE ngokulambisa amakholwa ahlaselwe yizinswelaboya zihlome ngezibhamu zabamba inkunzi esontweni.

Ngokusho kombiko weLowvelder, izinswelaboya ezintathu ebezihlomile zigasele esontweni eMkhuhlu ngaseHazyview ngezithuba zabo-12:00 izolo zasabisa ibandla ngezibhamu.

Kuthiwa zidubule ophahleni, zayalela abazalwane abesasemoyeni wogcobo ukuthi balale phansi ngezisu.

Izinswelaboya zibe sezifuna ngesankahlu amafoni,  ubucwebe nemali. 

Ngemuva kwesigameko, abasolwa babaleke ngemoto yebandla i-VW Polo.

Okhulumela amaphoyisa aseMpumalanga uBrigadier Donald Mdhluli usiqinisekisile lesi sigameko.

“Akukaboshwa muntu kuze kube manje, kodwa uphenyo lusaqhubeka,” esho.