Uphiko lwentsha seluxolise kuMbalula ngokumthela ngehlazo
UPHIKO lwentsha ye-ANC eMpumalanga lukhiphe isixoliso esisemthethweni nesingenamibandela kuNobhala-Jikelele we-ANC, uFikile Mbalula.
Lokhu kulandela isigameko esiphazamisayo sokumhahameza ngesikhathi ethula inkulumo yakhe ku-ANCYL National General Council (NGC) eKimberley ngoLwesihlanu.
USihlalo we-ANCYL eMpumalanga, uMnuz Bethuel Zunguza, usigxekile lesi senzo.
“Lo mbiko usebenza njengokuxolisa kwami ngaphandle kwemibandela kuwena njengoNobhala-Jikelele we-ANC ngezigigaba ezingezinhle emcimbini we-ANCYL NGC ezinkundleni zemidlalo eSeperepere,” kusho uZunguza.
UZunguza ukucacisile ukuthi lesi sigameko senzeke ngesikhathi ehambele izithunywa ebezixinwe wukugula okuhambisana nokudla.
“Bengingekho ngisho ngaphakathi endaweni… bengimatasa ngibhekelela isimo sezithunywa ebezinenkinga yohudo ngenxa yokudla ebezikudlile.”
Lokhu kubhodla, okuphazamise inkulumo kaMbalula kafushane, kubikwa ukuthi kuhlobene nezikhalo ngemiphumela yengqungquthela yesifunda saseHlanzeni.
