Lizovulwa kabusha icala loDJ abasolwa ngokunukubeza

UMVIKELI woMphakathi usegxeke amaphoyisa akuleli ngokungaphathi ngendlela icala lokuhlukumeza ngokocansi elithinta o-DJ ababili.

Ngokubika kwe TimesLIVE umbiko ka-Advocate Nompilo Kholeka Gcaleka uveze ukwehluleka ekusingatheni leli cala lokunukubeza elithinta oDJ ababili abaziwayo.

Isitatimende sikammangali kubikwa ukuthi siputshuzwe ephephandabeni iSunday World ngoJanuary 2021, elaphula ubumfihlo futhi labeka engcupheni ubuqotho bophenyo. 

Uphenyo lwabe seluvalwa ngaphambi kwesikhathi ngoFebruary 2021 ngaphandle kokulandelelwa kahle, okwashiya ummangali edidekile.

UMvikeli woMphakathi uyalele ukhomishana wamaphoyisa eGauteng ukuthi avule kabusha uphenyo futhi aqinisekise ukuthi lwenziwa kahle. 

Ukwengeza, i-SAPS iyalelwe ukuba ikhiphe isixoliso esisemthethweni kummangali zingakapheli izinsuku zokusebenza eziyi-14.