Kumshubele umalume obhekene nelokuhlukumeza umshana

UBUYELA ngesonto elizayo enkantolo yeMantshi yaseRoodepoort umalume obhekene nezinsolo zokudlwengula umshana (13).

UTshepo Ntsimane (56), waseDobsonville eSoweto uzoma phambi kwenkantolo ngoLwesithathu oluzayo ngecala lokuhlukumeza umshana wakhe.

Kumanje ugcinwe esitokisini njengoba ebevele izolo phambi kwenkantolo okumanje isaphenya ngalolu daba.

Ngokombiko, isigameko kusolakala ukuthi senzeke phakathi kuka-8 ebusuku ngo-April 3 kwaze kwaba yizintatha zangosuku olulandelayo ekhaya eDobsoville.

Ngokwemininingwane ekhishwe ngamaphoyisa yaphinde yabiwa ngabakwa-CrimeWatch_RSA, isisulu, besihamba no-anti waso nomngane wakhe oneminyaka engu-10 ubudala.

Baye emagcekeni beyopheka ngenxa yokuthi bekuphele ugesi ekhaya. 

Imibiko ithi umsolwa uNtsimane ufikile kule ndawo edakiwe. 

Usolwa ngokuphuzisa umshana into emenze wanesiyezi.

Kuthiwa umsolwa ube esequkula umshana wayomfaka emotweni eyayipakwe ngaphandle kwegceke nokuyilapho kukholalkala ukuthi umlale khona. 

Umshana kuthiwa uphaphama esehhovisi likamsolwa nokuyilapho kukhona obone konke obekwenzeka wakuqopha.