UJub Jub uboshwe ngezinsolo zokuzama ukudubula umshayeli
ISILOMO somrepha nomethuli wohlelo i-Uyajola 9/9 kuMoja Love sesikhalelwe amasongo kaSigonyela.
UMolemo ‘Jub Jub’ Maarohanye, oneminyaka engu-45 ubudala, ubhekene namacala okuthumba, ukukhipha isibhamu ngokungemthetho esidlangalaleni, kanye nokufihla ubufakazi.
Lokhu ngenxa yengxabano okuthiwa ube nayo nomshayeli we-uber namuhla ekuseni e-Edenvale eduze kwaseGoli.
Ngokombiko, kuthiwa umshayeli we-e-hailing ubesanda kwehlisa umgibeli wesifazane, okusolwa ukuthi wayeyintombi kaJub Jub.
Kuthiwa uJub Jub ube esephuma eqhantsha okwenhlamvu yesibhamu, waphoqa umshayeli ukuba ahlale, wabe esedubula ebhekise kuye cishe ngo-07:30.
Umshayeli uthe zinyawo zami ngibelethe, wasinda kanjalo.
UJub Jub usagcinwe esitokisini elinde ukuvela enkantolo kusasa ngoMsombuluko eGermiston.