Obethejwa yi-ActionSA uyilaxaze wayojoyina izimbangi

IGQEMEKE udume olungeqiwa ntwala i-ActionSA ilaxazwa yisethenjwa sayo ebesesiqokwe ukuba sizomela leli qembu kwesobumeya.

UHalalisani Ndlovu ulaxaze leli qembu likaHerman Mashaba ngemuva kokuba lo mholi ememezele uNdlovu njengomholi abafolosa ngaye kwaDukuza.

UNdlovu uvele walaxaza i-ActionSA maqede wajoyina i-Democratic Aliance (DA).

Kwisithangamu sabezindaba, uNdlovu uthe indaba yokushiya kweziluhlaza okotshani ibilokhu isemqondweni kuyena ikakhuluzi ngemuva kokuqokwa kwakhe.

Phakathi kwesinye sezizathu kube wukubona ukuthi udinga ukuba seqenjini elizokwazi ukuletha izidingo zomphakathi ngokuyiqiniso.

Umholi we-ActionSA KwaZulu-Natal, uZwakele Mncwango, ubhalele amalungu eqembu esifundazweni wawatshela ukuthi ahloniphe isinqumo sikaNdlovu sokuhlubukela kwi-DA.

UMncwango utshele amalungu ukuthi awabumbane futhi agxile okhethweni oluzayo lohulumeni basekhaya.