U-Afrika Cele uzoshintsha indlela okubukwa ngayo i-reggae

NGEMUVA  kokuhlaba ikhefu emculweni umculi we-reggae u-Afrika Cele useshintshe ukwenza njengoba esegxile ekukhuthazeni nasekulondolozeni umculo we-reggae.

Le ntokazi yasePort Shepstone eyaziwa ngezingoma ezinothe ngothando, ithi izimisele ukwenza isiqiniseko sokuthi lolu hlobo lomculo luhlala lubalulekile.

Uzokwenza lokhu yize ethi luthola ukwesekwa okungatheni uma luqhathaniswa neminye iminxa yomculo emisakazweni.

Ukuze asize ekuvuseleleni intshisekelo kulolu hlobo lomculo, usungule iMayibuye Entertainment, okuyinkampani yemicimbi eyaqala ukubonakala ngokuhlela Ugu Reggae eZuri Beach eMargate ekuqaleni kwalonyaka.

Lo mcimbi udonse abathandi be-reggae abavela kulo lonke izwe.

Uphinde futhi walanda izilomo zabaculi okuabalwa kubona i-Lucky Dube Band, i-Jahseed Di Fireseed, i-Afrika Cele, i-Bongo Riot De Rebirth kanye nabanye abaningana.

Echaza ngesinqumo sakhe sokugxila ekuhleleni lo mcimbi waminyaka yonke, u-Afrika uthe abaculi be-reggae bavame ukubhekana nezingqibamba yokuthola ukwesekwa okuqashwa  uma beqhathaniswa nabanye.

“Bengilokhu nginomuzwa wokuthi i-reggae ayitholi ukwesekwa okufanayo nezinye izinhlobo zomculo. Lokho kwangikhuthaza ukuthi ngisungule indawo lapho abaculi be-reggae bengacula khona futhi baxhumane nabalandeli babo eSouth Coast,” esho.
““““““
U-Afrika wengeze ngokuthi kubaluleke kakhulu ukuhlonipha ifa lesazi se-reggae esingasekho uLucky Dube. 

“Bekubuhlungu ukubona ukuthi iKwaZulu-Natal ikhiqize izinkakha ezihlonishwa umhlaba wonke njengoLucky Dube, kodwa lapha ekhaya akazange athole ukuhlonishwa okumfanele nobekulindelekile.

Yingakho ngijabule kakhulu ukuthi iqembu asebenzisae esaphila lizocula kulo mcimbi,” esho.

Uqhube wathi ngalo mcimbi bahlose ukuthi bahehe izivakashi eziningi ezivela ezweni lonke. 

Ukholelwa ukuthi lo mcimbi unegalelo ekuthuthukisweni komnotho wendawo ngokudonsa izivakashi ezivela ezifundazweni ezifana neLimpopo, iNorth West kanye ne-Eastern Cape.

“Lo mcimbii uzokwazi ukuhlanganisa abantu futhi uthuthukisa umnotho weSouth Coast.,” esho.