Yethulwe ngempumelelo incwadi yamahubo ka-Andile KaMajola

UQOPHE umlando umfundisi u-Andile KaMajola ongumakadebona emculweni wokhoLo ethula ngokusemthethweni incwadi “Uhambo Lwamahubo nezZihlabelelo zikaMoya (Journey of Psalm Hymns & Spiritual Songs) emcimbini obuse-Inkosi Albert Luthuli International Convention Centre Arena, eThekwini.

Ethula le ncwadi uKaMajola obebungaza iminyaka engu-26 eyibambe ishisa emculweni, unxuse bonke abefundisi nababhishobhu babe naye esteji naye.

Inhloso yalesi sicelo sakhe bekuwukuyethula enabo incwadi yodumo eneqoqo lamahubo awu-300 azibhale yena. 

“Lezi zingoma sekungezenu nesizukulwane esizayo. Noma sengingasekho emhlabeni zizosala zihlatshelelwa. lena iyona nhloso yami yokubhala incwadi “Uhambo Lwamahubo nezihlabelelo zikaMoya”. 

“Akuphelile, le ncwadi isazokwethulwa phambi kweSilo Samabandla Onke (ISilo Misuzulu KaZwelithini) nakuMengameli wezwe (uMengameli Cyril Ramaphosa),” kubeka uKaMajola.

UMbhishobhi Vusi Dube ubongele uKaMajola ngale ncwadi yamahubo obesekunesikhathi eside aqala ukuyibhala.

“Sonke sikhona namhlanje sizobuka uNkulunkulu enza okungakaze kwenzeka. Ngicela ukunitshela le ncwadi yamahubo izobakhona.  Sasingekho mhla kwethulwa “Izihlabelelo”, sasingekho mhla kwethulwa “Icilongo”. Namuhla sikhona uma kuzoqala “Uhambo Lwamahubo” kumele sibungaze phambi kukaNkulunkulu,” kubeka uMbhishobhi uDube.

Ubonge bonke abafake isandla ngesikhathi umfundisi KaMajola ebhala Uhambo Lwamahubo , okungu-Apostle Dlomo, uMbhishobhi Nhlapo, uMbhishobhi Mpendulo Nkambule noNkk Zanele Mbokazi ongasekho emhlabeni.