OwoMkhokha ubonga abameseke ohambweni oluya eGhana

SIBONGA siyanconcoza isihlabani somlingisi ngokwesekwa esikuthole eminyangweni kahulumeni wesifundazwe ohambweni lwakhe olubheke eGhana.

UDeli Malinga ubonga nje, kungenxa yokuthi iKZN Film Authority  neKZN Tourism  benze konke okusemandleni ukuthi uhambo lwakhe luba yimpumelelo. Akabashiyanga ngaphandle labo abelule isandla bekhombisa uthando nokweseka akwenzayo.

Lesi silomo sihambele eGhana ukuyothamela umcimbi wezindondo. Okwenza lo mcimbi ubaluleke kangaka kuDeli Malinga yingoba uqokwe emunxeni omkhulu we-African Female Actor of The Year kumaLadies of the Media Award. 

Uqokwe ngenxa yendawo ayilingisa kuMkhokha: The Curse nokuyilapho elingisa indawo kaThenjiwe MaMzobe Gumede.

” Ngiyabonga kakhulu kwiKZN Film Authority  nakwiKZN Tourism angikaze ngicabange ukuthi uhambo lwami lungaphumelela. Enikwenze kumina nikwenze nakwabanye,” usho kanje.

Sekungumlando ukuthi uDeli uphumele obala ekuqaleni kwale nyanga ngezingqinamba abe nazo ukuya kulo mcimbi. Kulapho ebecela uxhaso lokuya eGhana kulo mcimbi.

Phakathi kwezizathu azibeke njengezidale ukuthi aphumele obala kube wukuthi imali anayo uyihlelele okuthile kanti nesikhathi aziseke ngaso sibe sifushane.

” Nakuba ngangijabule kakhulu, ngavele ngakhululeka ngoba ngangangazi kahle ukuthi ayikho indlela engizoya ngayo lapho.

Kwaba isikhathi esifushane futhi ngangingenayo imali enele njengoba umsebenzi ebengikuwona waphela ngo-October nyakenye futhi engikulondolozile ngikuhlelele ukutho kungithwale ngize ngithole omunye umsebenzi,” kusho uDeli.

Namuhla, umemezele ukuthi usendleleni ulibangise emcimbini eGhana.