Kuphelile ngomshado wabahlangana kwiBig Brother Mzansi

KUQAQAMBA izinhliziyo kubalandela babashadikazi bodumo lweBig Brother Mzansi 3 asebememezele ukuphela komshado wabo.

UThato Immaculate ukhiphe isitatimende ememezela ukuphela komshado wakhe noGashwan “Gash1” Brandon Mthombeni.

Kwisitatimende kuvezwe ukuthi imbangela yokugqabuka kwefindo likasofasilahlane kube ngenxa yezigameko zakamuva ezenze umshado wabo wangabe usakwazi ukulungiseka.

Ku-X (obuwaziwa ngelikaTwitter) uThato ucacise ukuthi lokhu okwenzekayo akungenxa yokuphinga.

” Ngicela ukucacisa akuhlangene nokuphinga,” esho ngamafuphi.

UThato ubalule ukuthi imindeni yabo isihlanganile yaxoxa ngalesi sinqumo abasithathile.

Laba bobabili bahlangana ohlelweni iBig Brother Mzansi 3 ngo-2022 bashada baphinda babusiswa ngengane eyodwa.