Ingwazi yomlobi yoweshashalazi ikhala ngokungaxhaswa kusanesikhathi
UMBHALI wemidlalo yeshashalazi enohlonze uBongani Mbatha obuye abe ngumlingisi ukhala ngokungalutholi uxhaso kusanesikhathi uma ehambisa imidlalo kwiMakhanda National Arts Festival ezoqala ngoLwesie isongwe ngo-August 5 e-Eastern Cape.
UMbatha weGcinumelusi Arts Movement kulindeleke ahambise i-Echoes of A Verdict ehlelelwa ukubukwa kusuka ngoLwesihlanu oluzayo kuze kube yiSonto.
Lo mcimbi osukwihladla lesithathu uzophinda ukhuze ibuya ngoLwesithathu olulandelayo kanti kubhekwe ukuthi udonse izethameli namaciko akuleli nasemazweni aphesheya kwezilwandle.
Eminyakeni emibili edlule umdlalo wakhe Abaphansi wabuya nendondo iStandard Bank Standing Ovation kanti ngonyaka odlule esehamba yedwa kwiSweet Darling, wabashiya besafuna impinda.
Uthi nakulokhu njengoba elungiselela ukuyokhangisa nge-Echoes of A Verdict uhlalele ovalweni ukuthi uzogcina elutholile yini uxhaso njengoba ekhangeze emnyangweni wezamaciko KwaZulu-Natal.
Uthe kunzima kuye nakubalingisi asuke ebaqashile ukuzilungiselela kahle ngokomqondo njengoba besuke bengazi ukuthi bazohamba ngani, uma begcine behambile belale kuphi.
Okunye athi kumphathisa ngekhanda ukuthi uzoyithatha kuphi imali yokuholela abalingisi abaqashile njengoba kucwebe iziziba.
Uthe asekuqaphelile njalo uma ehambele eMakhanda amaciko akwezinye izifundazwe afika ehlinzekelwe, kucaca ukuthi lapho esuka khona bayazi ukuthi bayobamela, akumele bafike babe inhlekisa.
Nokho uthe uhlalele ethimbeni ukuthi umnyango oholwa uMtomuhle Khawula uzoqhamuka ekugcineni wathi nokho ufisa lokho kwenzeke kusanesikhathi.
Mayelana nomdlalo uthe uwususe esigamekweni esenzeka ngempela ngomlisa waselokishini laseThekwini owaboshelwa into engekho, uthiwa udlwengule ingane yakhe. Kuthe uma sekuvele iqiniso ngemuva kokudonsa iminyaka engu 13 lapho ayehlukunyezwa khona iziboshwa, wakhetha ukungaphinde azihlanganise nabantu esephumile, waqoma ukuyozihlalela ehlathini.
Ngaleso sizathu wathi kungcono ukuhlala nesilwane ngoba umuntu akasemethembi.
“Isifundo engihlose ukuthi kuhlonyulwe ngaso ngalo mdlalo ukuthi ungalala nomuntu othandana naye, ngakusasa avuke akujikele esethi akazi ukuthi uvuke kanjani embhedeni owodwa naye.
” Ngalo mdlalo ngihlose ukuveza ukuthi imithetho ngesinye isikhathi ibenzela phansi abantu abangenacala nokuthi kunzima kangakanani ukwethenjwa emndenini nasemiphakathini uma abantu bebenesithombe sokuthi ungumenzi wobubi,” kusho uMbatha, oseke wabonakala emdlalweni kamabonwakude efana noZalo, Amalanga Awafani namanye.
UMbatha, osebenzisane nomlingani wakhe weminyaka ongumlingisi uBhekani Shabalala njengo-producer, ubophele abalingisi abachaze njengalabo abazoshiya izibukeli zibheme zakholwa.
Ugabe ngoWandile Nodliwa olingisa indawo ephambili, Nomtha Nkosi, Alwa Mthembu, Nhlanhla Zondi, Menzi Ngidi noLinda Mbambo.