Kuboshwe isikhulu samaphoyisa ngohide lwamacala
SELIKHALELWE ngamasongo kaSigonyela iPhini leNhloko yoMnyango wamaPhoyisa kaMasipala wase-Ekurhuleni (EMPD) elisamisiwe emsebenzini.
UBrigadier Julius Mkhwanazi (50) uboshwe ngoMgqibelo ekuseni emzini wakhe oseGauteng ngamacala okukhwabanisa, inkohlakalo, nokuphazamisa ukusebenza kwengalo yomthetho.
Ukuboshwa kwakhe, okwenziwe yithimba le-SAPS Madlanga Commission Task Team, kulandela ubufakazi bakhe abethule phambi kweKhomishana kaMadlanga.
Kulapho ebhekane khona nemibuzo enzima ngezinsolo zokungaziphathi kahle ngaphakathi kwi-EMPD.
UMkhwanazi wamiswa ngoNovember wanyakenye ngemuva kokuba ucwaningo lwangaphakathi kanye nobufakazi bekhomishana bumhlanganisa nokungahambi kahle, okuhlanganisa ukuxhumana okungabazekayo nosomabhizinisi uVusimuzi “Cat” Matlala kanye nenkampani yakhe yonogada, iCAT VIP Protection.
Okhulumela amaphoyisa u-Athlenda Mathe ukuqinisekisile ukuthi uphenyo ngenkohlakalo engaphakathi kwi-EMPD lusaqhubeka, iziphathimandla zifuna abanye abasolwa.
UMkhwanazi kulindeleke avele enkantolo ngoMbombuluko.
