Sikhonjwa ePortugal isilomo samaBhakaniya

KUNGENZEKA i-Orlando Pirates ilahlekelwe u-Oswin Appollis  (osesithombeni) okhonjwa kwizinkunzi zasePortugal i-FC Porto.

Kuthiwa leli qembu selibeke etafuleni isamba sika €4 million (obalelwa ku R71 million) ngalo mdlali obeyingxenye yeBafana Bafana esanda kukhishwa kwi-FIFA World Cup eqhubekayo e-USA, eMexico naseCanada.

U-Appolis ungomunye wabadlali abafike baba umgogodla kwiPirates esuka emthathe kwiPolokwane City ngesizini edlule.

Izingqapheli zimbona kumfanele ukuqokwa njengeFootballer of The Season ngenxa yeqhaza alidlalile iBucs inqoba izicoco ezintathu okuyi-MTN8, eseBetway Premiership neseCarling Knockout.

Uma lo mdlali egcina esayinwa i-FC Porto uzoba umdlali wesithathu kuleli ukuba semabhukwini ayo.

Owokuqala kwaba uMandla Zwane owakhuliswa iPirates ngo-1994 kwalandela uBenni McCarthy owaqopha umlando eba umdlali wokuqala kuleli ukunqoba isicoco se-UEFA Champions League ngo-2004.

Bobabili uZwane noMcCarthy babeqeqeshwa uJose Mourhino obalwa nabalolongi abahamba phambili emhlabeni.

I-agent ka-Appolilis uLance Davids ithe akukho engakusho okwamanje, yathi akulindwe iPirates idedele isitatimende njengoba yenzile odabeni lukaRelebogile Mofokeng.

Kuzokhumbuleka ukuthi kushone elayizolo sekubikwe kaningi ukuthi sekusele aphase ukuhlolwa udokotela bese eba umdlali weRoyale Union Saint-Gilloise yaseBelgium, eyake yadlalelwa uPercy Tau owayeyisihlabani seMamelodi Sundowns neBafana Bafana.