Ubanjwe ngqi ukapteni osolwa ngokukhwabanisa
ZIMKHALELE ukaputeni ohlonishwayo wamaphoyisa ngezinzolo zokukhwabanisa.
Ukaputeni oneminyaka ewu-53 wamaphoyisa akuleli osebenza ngaphansi kophiko olwaziwa nge-Protection and Security Service (PSS) uboshwe ngoMsombuluko kulandela izinsolo zokuthi wasebenzisa ulwazi ayenalo ukutamuza izigidi zamaRandi.
Amaphoyisa aqinisekisile ukuboshwa ngoMsombuluko.
Okhulumela amaphoyisa kuzwelonke uBrigadier Athlenda Mathe uthe ukuboshwa kwaleli phoyisa kwenzeke ngemuva kophenyo lwangaphakathi oluvunyelwe yi-Division: Financial Management Services ngemuva kokutholakala kwezentengiselwano ezisolisayo ohlelweni lwe-Polfin.
Kulindeleke ukuthi ukaputeni avele eNkantolo yeMantshi yasePitoli namuhla ngoLwesibili.
Lesi sikhulu sasimiswe emsebenzini ngaphambilini ngemuva kophenyo lwangaphakathi.
“Ngemuva kophenyo olude, icala lokukhwabanisa labhaliswa esiteshini samaphoyisa saseSunnyside kanti uphenyo lwangaphakathi lomnyango luholele ekumisweni kwakhe umsolwa,” kusho uMathe.
