Kugwetshwe abebezama ukuthakatha umengameli wezwe
INKANTOLO igwebe amadoda amabili iminyaka emibili edonsa kanzima ejele ngemuva kokubalahla benecala lokuzama ukukhunkula umengameli wezwe.
Abagwetshiwe, uJasten Mabulesse Candunde, ongowokudabuka eMozambique, noLeonard Phiri, inkosi yaseZambia, baboshwa ngoDecember 2024 eLusaka.
Amaphoyisa athi batholwa bephethe imisila yezilwane, izimpushana, indwangu ebomvu, nonwabu okusolakala ukuthi bekuhloswe ngalo ukuthakatha ngakho umengameli waseZambia uHakainde Hichilema ( osesithombeni).
Abashushisi batshele inkantolo ukuthi la madoda aqashwe nguNelson Banda, umfowabo kasopolitiki weqembu eliphikisayo u-Emmanuel “Jay Jay” Banda, owabathembisa inkokhelo enkulu ngalesi senzo.
IMantshi uFines Mayambu ithe leli cala lidlulele ngale kwezinkolelo-ze, ilichaze “njengengozi yokuthula nokuvikeleka kwesizwe.”
Lesi sinqumo singesokuqala ngqa eZambia, nokuyinto esise umsindo.